SAM

SAM

Followers

Dengarkan Utara.FM - Macam Biasa Juga Bah

Sunday, March 1, 2009

Noke’ad Oku Id Puun Do Ramag

Talob id Tandek 30 toon dit gulu. Insan tadau ari satu, minakut oku noh tumalob sid Tandek. Nokorila oku i boh tu katatad noh diri gima mamanau mongoi id Tandek tiya diri. Gama dot kotomon amu erasaan it panaon lumaga id Tandek mantad id Longob. Kotimpuunan mamanau tumalob sera gaganta okitanan noh ot tana mari. Ponibakon tuturan, anawau noh banar kalaga nogi dino sid Tandek. Eyabo nopoh boh ot tulun tumalob id Tandek. Iri noh tu mukuyut oku dit tunturu di bapa tu mokoiyi atatak sid pitalaban. Misop-isop okoi dialo dino sid kinogumuan dot tulun. Iri noboh katamananku makan-akan poh dot kininjaram dit maya-waya oku di bapa misosoriat dit mogiim yalo dot dagangon. Kadung orikot noh dit momoli dot sada, turus dot Sama dino it pomoros dialo. Sumimbar nopo it Sama padagang sada nga boros i do Kimaragang, iri it ababatil. Nunu poh sompi kakalakak noh dino yaalo dot nokopiarati, om misosot noh dino dot torogo. Amu insan misop sid padagangan dot sada, tadpom aku elalaan it kondiriku dot siti silo nopoh mogigintong dit kojinisan dot sada. Mongirak it tongo Sama dogo tu songko duatoku nopoh di bapa dot nunu song sada ilo kangku. Apapagan nopo yalo, uupan noh dino dit tongo Sama I bapa. Nopongo okoi momoli dot sada, pamanau okoi noh ponong sid piras dit bawang dot Tandek. Kasambat diri i bapa dit tongo tambabaya dialo dati iri, na ogumu boh ot tuturan diri. Nokokowiliku noh it tongo talud sid bawang, asanong om emayaan oku babanar mogigintong tu a insan kokito dogima. Na minongimpuros oku noh diri dit tongo talud. Kela’aiku poh om id piras oku noh dit bawang dot Tandek diri. Kowili oku diri nga nunu ot tinganan, aku noh nokitanan i bapa, mogunsisirot oku poh diri nga aso ot otututunanku dit tongo tulun. Nar, notigagang oku diri owoh. Toronong oku poh diri sid puun dot ramag om pengkakat siri. It titimpuuni miradit oku nogi om sasambil monoyinu oku nunu kelelo ong waro ot okitananku dit otututunan mantad id Longob. Aso i ot okikitoku boh, nunu poh noke’ad om nokolondui oku diri sid puun dot ramag id piras dit bawang do Tandek. Na, it tongo tulun tumalib song boboros dino dot ‘ai disai dot tanak obelo dot nokotongkiyad dot moleeng’ kah dino. Oleled waro diri memeleng mangatatang dogon dot aku otutunan. It wokon sompi duduat noh dino ong kotutunko amu dogon. Mingut-singut oku poh diri, tu waro minangatatang dogo. Kotitimpanku noh i mama tumoronong mantad sid kadai di Apuk, modtui ponorowos oku diri manangkus sumamung. Tabpaaiku noh i mama, gopuso oku noh dau, nga nokolondui oku noh diri kembagu mogiad. Isai-isai it memeleng minongoruang om minangatatang dogon diri, kotoluadan nopo sid dau om tongo tanganak dau. Talob id Tandek makaa. Ogumu boh tulun tumalob tiya diri sid talob ari satu dot Tandek. Nga siongo poh kah diri dat makaa. Oyoyongowi diri at Tandek. Kah di Tulun Kimaragang om siti silo noh ot tetee dot karabau id kakadaian dot Tandek kah. Sakot posorili nokorombung om kotirung diri dit kakadaian dot Tandek. Na, kah dit tongo kinoruangan om amu okitanan gam tongo YB om PKR iti kowowoyoon do Tandek diti? Madko mengkababasan noh diri iti tongo tulun id Tandek marap daalo dino. Simoyoon noh boh dot pialalaian daalo inot Tandek. Kada tokow poh urupo dino dot miodop-odop id tanga dot ralan om miyak-giyak sumurung iradko baanan dot karabau dot mokimoyo tongo YB. Okon ko koobasan tokow ot irad diri. It koobasan tokow mari diri, mitatarabang dot gamaon. It misikul oku poh, waro kinoruangan dit nadarakan pulitik sampai momulitik dogon tumuop sid pulitik tu maya noh dot pulitik om kibantaran nogi kabarasan dot monundan dit kopoposion tulun kondiri. Simbaro ku yaalo, sera kah dot tumuop noh dot pulitik om kadapat tokow nogi monundan dit koposion tulun tokow, ogumu poh gama wokon kotutulungan kangku, nga mad nokokotip dot lios diri it koruangku. It pongindanan tokow ponong sid Tandek, nga sampai biano kakali tokow engaranan dot kinoumpugan tulun nadarakan musikin sid Malaysia. Siongo noh mah it kinoruangan dit kiawau dot pulitik diri dit monulung kabarasan dit kopoposiyon tulun tokow boh? Nongo kapaig dati iri owoh, ko kakali nokogutan, ko mongindad poh dot awasi ot tinipi yoh. Sisimoyoon noh yaalo dino. Kukuro potindal dit talob id Tandek. Biano kukukuro i, mingkakat kah antawa otowunan dot tetee karabau kah inot Tandek okon noh ko id palad dot tulun pulitik. Kengkakakatan dino Tandek gigiratan dot tulun Tandek oboh. Iri noh, ong nopurimanan dot nokowiliw daton, somito tokow noh wagu. Ogumu boh ot ralan popengkakat kembagu dot Tandek. It etung-itungku do yoku:- Keso. Mongoligow sid tongo tulun dot Tandek, dot waro pitatabangan monginluwas dit Tandek. Kakatuk noh mah dot tongo sangadaw sumiwat monginluwas dot Tandek om amu osiwatan, ongo bagos tokow i mari diri. Om okoni ko nunu ot maan nga monginwawasi dot Tandek. Balanja, kawasa dumuat sid YB, PKR, it momukadai id Tandek, nga nunu kelelo ong aso kasaap daalo manaak dot ponginuman poh nga aso i karaatan mongolutu dino. Kumoduwo. Miatur it tongo kokompungan id Tandek, miowoli monikid ari satu miagung sid talob dot Tandek. Nunu poh ot pokikirayaan tokow nga ino noh sumirid mangandak om mongigol, tumanud dit lalanu titikan dot pinakang, maambot salasakon, salaton dot botukul om oomboton, om ogungon dot duwo tawag. Aramai boh, inot miagung mari dino om kotinong i dot tulun. Nunu ot maan dot sori nogi id bandau ot piogungan. Na, apanat ot miagung mari, kah om aso i ot tasil kah do wokon dati, nga pongowit kow noh boh dot dagangan, kakaatuk mah ong sino noh mangaramai om aso ot kotutulung tulun tokow dit nowowosian monginongow om mogigintong dit koobasanan dot tungkusan tokow. Kumotolu. Mangatur dit piimbasan monopuk, monokon, mitubau om wokon poh it pomingkasaan le'ed. Aso noh mari ot dupot sopukon makaa, nga tungkusai tokow sid gama poh dot pomingkasaan boh dot miimbas dino isai it otulut monopuk ko monokon. Mianggan poh dot tubau mogiim disai tubau it odod. Na, tadat sid piimbasan, waro ot todia. Na, oturon noh boh dot isai ot engin tumanud dit pomingkasaan potontuon noh ot yuran, siri noh ot pongoturan dot odia dino. Kumaapat.Kumolimo.Kumoonom. ... Kumoturu. Lologoto duyu nonoh tu, ongo elo kowi mongitung mari ong otimpuunan poh, na dikoo noh ot tontok dino momudali dit wokon kukuro gama popengkakat dot Tandek. Tungag om tingan kow noh monimban dilot Tandek. Iti tulun tokow mari diti, pomoyutan mari sera mongolagkang pamaalan dot walai ko rumilik ko mamanau ko nunu nopoh it gamaon tagayo, mongindan dot tinipi mari. Tingkadai tokow ino moongindan dot tinipi dino tu amu osodu ot korikoton dino. Posik kow noh om gayad noh gumama. Amu tokow diti noporisanan sinuwu dot YB popakaan, om isai mah daalo dino ot landu kotoluod gisom monuwu poh dino daton. Nga biano diti isai-isai dikoo nokotudung diti surat om kopurimon kow irad ko it komoyoonku diri, logoto noh dikoo mangaatur sino. Okonko madaada mongindad dot suwuon. Odurunan i, ilot Tandek otowunan dot tetee karabau. Notuwad noh it ramag sid piras dit bawang dot Tandek dit pinogiadanku dit tanganak oku poh mari diri, kada tokow noh pogkoruduai iti kowowoyoon dot Tandek makaa. Kayow noh tumingan monimpuun monginwawasi dot Tandek. Nga ino boh ong orubatan tokow poh dat Tandek. Yoku siti id tisan tana ponong id Tawau, gisom noh dot musig-usig iti. Ano kukuoyon ong araat noh boh kotutudungan dikoo diti sinuratanku om madko giginarai dati kokitanan. Nga ong owowosian kow poh dara'ai diti tuturanku siti, kotoluadan kumaa sid dikoo kikiawi. Nota: Koringing i mari ki inot tetee dot karabau dino, kantoh no'ong sid toning paangakanan dot sup. Lumangad oku i dit sup ralut di Kimin di mula owoh, hi.. hi.. hi..

8 comments:

Tanak Gouton said...

TANDEK..Satu nama keramat. Kalau dulu2 masa Pekan Tandek ditepi sungai, terasa sangat kemeriahannya. Tapi kini segalanya bagaikan mimpi ngeri..
Sebut saja nama Tandek, itu hati pun akan mengeluh.. "ala..la..tiada mud o kalau p Tandek. Tiada daya tarikan ba d Pekan Tandek.." Inilah keluhan jiwa hampir semua yang mendengar nama Pekan Tandek. Namun TAHNIAH kepada rakan2 blogger dari SAM yang begitu bersungguh2 mempertahankan HAK PRIBUMI Tandek. Mudah-mudahan ada 'mukjizat' akan jatuh di Pekan Tandek..
Saudara Mogorons..posting ko ni betul2 menusuk kalbu pada part ko putus jejak dgn ibu bapa ko. Macam berkaca2 mata sya aman...hehee

JMimie Mabin said...

salam dan selamat berkerjasama dalam SAM pinsan Mogoron! otomon okoi tu natambaan ot 'duktur' sitid SAM..hehe.

Awasii no kiobo mambasa diti tuturan nu. Ino pomat sisiri oku mongukut dot tulu tu ai bo..madko kapapayaan ku i mangarati kikiawi (aralom om alanji obo iti momogun nu)nga nawi ku i bo mambasa tu ogumu ot anu anu om apalajaran ku.

Gotong oposik po bo tongo tulun kabasa diti tuturan nu. Amu poma at tongo YB2 nga subogiyong yomogun po dara'ai supaya otungag talalangkas iti kopoposiyon dat Pekan Tandek daton.

ison said...

Ai, nokombal ko bala mogiad id puun do ramag silod pakan tandek leed bo to. Hee...

Ka di sanguru om okon ko 'pak turut' om okon i ko sabab miobpinee nga ong babanar no, nunu pot ulason togumu.

Nabasa ku ilo pibabarasan silod kadai kupi SAM pasal diti posting nu. Awasi i ong adapat nu menterjemah sid malayu tu ka di sanguru kembagu om orubat iti 'mesej' amu kosondot sid wokon tongo kinoruangan. Kada po boroso it okon ko Kimaragang. Intai i mimie nga oleleed oku sabat mambasa tu aralom ot boros Kimaragangnu ka. ;)

Tupono: Oturo ka dikoo sino tikung, mumbal tokow monginlow tongo kinoruangan momorisi dilo Pekan Tandek. Mogot no pangajaru tongo 'pihak berkuasa tempatan'.

NONG said...

Osukung oku dika mimie..aralom iti momogun di Otto diti nga sukur no bo tu orotiyan e daton..

Ison..mad awasi at rasa ku dino sadangan nu dino.Mangai ka wo Tekong Sanguru. Mangajaru tokou po.
Aso e karatan atas nama 'Sukarelawan Anak Watan Tandek' ka pomunan. Mogot no pongumpok dat tongo pihak berwajib. Mad ko manja yaalo diti.
Ya..intangai pogi dikoo at post di Rozan ad blog dau nga aramai.. It dewan Pekan Tandek nga ibarat 'dewan berhantu' ka d Rozan. Waro dati monsimong miniyon tu amu gima insan pakayo at dewan dilo bo ntuk sebarang program. Mamaal dot mamaal e YB dot program untuk DUN Tandek nga siti nopo id Pekan KM...ororopoto babanar.

ison said...

Asee da bandau 'dialo' dilo ong okon ko tulun do Tandek, khususnya Kimaragang (tu majoriti sitid Tandek) ot ogumu minongundi. Patut2 tumimpuun mantad silod pakan Tandek 'monginlanji' diti kawasan Tandek tu buli boroson dot ilo no 'mercu tanda' dot Tandek.

Minangai no dara powolio dogima it pakan Tandek tu awasi i dara tujuan bo diri nga nunu mangan o. Tetee nogi dot tongo karabau ot tumalob silo tidino.

Nota: Nong, su'o nogi yaalo pawaliw dilo dewan ad Tandek pakaa silod Longob. Ogumu i ot mamakai dino silo.

Umar al-Longobi said...

kopiwosian pinsan tu nakajadi kono tuan rumah siti walai daton (SAM). pounsikow sanguru tu asaragas om oligang karajanu. arapon nopo awasi e kompuson iti pisompuruan tokow. bah, mikibanar okupoh memoros boros dang malayu sabat ki.

1. bagi saya, bahasa yg digunakan penulis (termasuk sanguru dll pemilik blog kimaragang) adalah antara bahasa asli dusun kimaragang yg sekarang penuturnya ramai yg sudah berusia dan pergi meninggalkan kita. jadi, usaha penulis adalah kesinambungan yg amat baik bagi memelihara bahasa ini agar terus bertahan seiring dgn peredaran zaman.

2. setuju dgn cadangan kwn2 tentang penterjemahan. bukan sahaja pd sudut bahasa kimaragang, tapi juga bahasa bajau (Lt M Muss, apamcm?). memang sukar kerana terpaksa bekerja 2 kali dan perlu masa yg panjang. apapun, sy kira sinopsis/abstrak entri dlm BM pun sudah memadai.

3. tahniah kpd penulis. entri yg bukan sahaja menonjolkan bahasa yg berkualiti tetapi juga berjaya menyentuh budaya dan ketamadunan khususnya penduduk di sekitar pekan tandek. teruskan menulis!

SANGURU said...

Moloyuon om momogunonku.SAM memang amat bangga seorang lagi phd Tandek "merendah diri" menerima tawaran jadi penulis. Bah, piara o' noh iti ruangan BOROS KIMARAGANG . Setakat bahasa, isinya tentulah pelbagai dan yang "kitonsi, kionsi om on'sian..".

Mogoron said...

Kopiwosian diko kikiawi dit miniradit mambasa dit tuturanku diri.

Tanak Gouton, awasi tu ki tisu koh i diri boh dot pomiid dit romou nu. Okon ko tinomodku popembulai dit romou nu ki.

Nopongoku noh padalin dit tuturanku diri sid malayu nga inwosian poh.

Nota: Walaupun Pekan Tandek dalam keadaan menyedihkan, Tandek tetap dekat di hatiku.