SAM

SAM

Followers

Dengarkan Utara.FM - Macam Biasa Juga Bah

Tuesday, August 11, 2009

Nokosuwai Pomusaraan Soleleed Id Malaya.

Soleledku id Malaya ogumu noh korogian dot kinoruangan nongosasambat. Waru atantu ot kinoririkoton sid Malaya, waro nogi maasalat ot nokosuawai noh ot ginawo. Eranan oku nga amu kukuoyon tu kalu noh ong kinenginan dot irad ko iri. Masaan diri, kakali oku poh balajar sid U kabarasan. Ogumu boh kinoruangan song ampon-ampon, nosusu'ut om nokosusu'ut, nga aso iso ot nokosuwai ot pugiginawo. Kopisuwang i ot tuturan yah, kakalu dati dot kopitimbang it gama momusorow. It wokon kinoruangan linumaga sid Malaya tontok diri, iri noh dogima tu mogiim karaja. Awasi baabanar it ompopodon daalo dinoh nga amu ku elaan ong kukuro it gama daalo momusorow dit kondiri, moleeng, obpine antawa tanak sawo dit niduanan sid kampung. Insan tadau, nokorikot sid walai siniwaan yah pipiro kinoruangan minagandaa dit koruangku moniwa. Mitututuran okoi dinoh. Waro iso koruang dit minagandaa balaai diri mantad sid Tandek nga ponong sorii id ogumu ot kantalan. Aku kotutun dialo nga reetan ku di "Joe" nopoh siti, dot ponginwasi tuturan. "Nunu ot maan nu siti id Malaya oi Joe?" "Kumaraja owoh." kah di Joe. "Siombo om nunu ot karaja nu?" kangku wagu mad moniasat baabanar. "Siloo id Klang Lama, karaja electronic engineering? Pasal poh dot elektronik, elaanku kikiawi ino mangagama." 'Ai, atantu i banar bala yaalo diti.' kah dit ginawoku. "Oleed oku kumurusus sid Jipun dit gulu pasal dot engineering, waro sontoon irih. Nunu ot maan owoh, ong at TV iidiyo dilo ong uyasonku, elaanku i ilo poolit kembagu, om tongo nopoh song siaran nga aanu dino." kah di Joe minomoros wagu. Tiya diri aso poh ot Astro. 'Ades, nunu song engineering dialo diti dot nosomitan id Jipun owoh' kah dit ginawoku. "Ba, soleleed nuh sid Jipun, okukuro ot kowowoyoon pomogunan daalo?" kangku mongoduat. "Ades, awasi banar sid Jipun, okonko irad siti." kah di Joe sumimbar. "Waro ot salji sori oi?" kangku noh. "Waro dino salji id Jipun." kah di Joe kembagu dot apatong it pod simbar. "Soleleed nuh sori, sera om waro ot salji rumikot?" kangku noh kembagu. "Monikid minggu ino oi aman dot waro salji." kah di Joe. 'Yu, elaan kah dialo iti dot waro apat ot musim id Jipun.' kah dit ginawoku. "Ai nobobos koh diri boh mingkaso dot salji soleleed nu id Jipun." kangku noh wagu. "Labaa i oi aman." Kah di Joe. Gisom siri, nelaanku noh dot iri ngaran dot kadai kinarajaon di Joe balaai iri ot "Electronic Engineering". Ba isai-isai kinoruangan dit songkakaraja id Malaya, tontuon boh kumaraja om momusorow, kada kow tumiruwan di Joe. Kopupuson tabar norongowku pasal di Joe, mindamo poh sid kinoruangan dot RM0.50 monikid tadau pomoli nasi lemak. Amu noh dati nalaku it engineering dialo diri sid karaja yoh tu tinumingan diri yalo kabarasan dit reetan dot "DADAH!" Nota: Joe (bukan nama sebenar) adalah antara pemuda KM yang terperangkap dengan budaya baru dan asing baginya di Kuala Lumpur. Tulisan ini adalah kisah benar dan wajar dijadikan peringatan kepada anak-anak KM yang mencuba nasib di Semenanjung Malaysia (Malaya, kata orang kampung saya).

3 comments:

SANGURU said...

adesss aman, noguring ko toruai di Joe...bohhh.
(Hmm, tuan...kena kelentong sekejap oleh si Joe...yea).

"BAHASA JIWA BANGSA"
(BOROS TATOD DOT BANSA"

NONG said...

satu cerita yang begitu baik dan penuh pengajaran.
Osodu peno Mananjung dino Bro. osomok at KK nga ogumu tanganak daton kecundang dengan pengaruh DADAH.
Kesihan mata memandang tapi kita tidak mampu berbuat apa2 kerana mereka didatangi pilihan tetapi memilih pilihan yang salah.
Semoga setiap belia remaja kita akan menjadikan cerita ini sebagai sempadan hidup bila berjauhan dengan keluarga.
Jangan musnahkan hidup dengan DADAH.

SANGURU said...

aku e rumosi banar tongo DADAH, paling korosian ku...adesss, sombungai ka oi illie...oi LM,..oi Umar...oi mogo...oi ming...oi carl...oi mus...oi din...oi tom...oi DJrumput...hehehe
(main2 aaaaa...)