SAM

SAM

Followers

Dengarkan Utara.FM - Macam Biasa Juga Bah

Friday, September 18, 2009

Tungkusai Noh It Boros Tokou Kondiri.

Ong waro noh ot moonuduk sid sikul dit boros dot momogun, andangko su'on ku it tanak yah mogom sid tudukan dot boros momogun. Kararatan aso ot momogun monuduk sid sikul daalo tu minaliw noh ponong sid kineyonon dot momogun it iso ot monuduk boros momogun siti. Ogumu ot tulun momoros dot "rojak" it tudukan diri gisom amu sumokubang poh. It tanganak nga amu su'on mogom sid tudukan dino. It nosorow, boros nopo dot momogun nga amu koowit dot komojuan, amu owit midagang, kamamalu nogi tu atanggayan kabarasan dit kentutunan tulun osusa. Iri nogi subai ko ubason dino it tanganak dit boros bansa wokon om kowosian ong it boros bansa dit nokoulok noh sid wulan. Minsan pomah irad dino, sundui dot orompus tokou i bala'ai ong endaraatan it bansa tokou. Nga nokuro tu amu tokou opurimanan dot tokou i kondiri bala'ai ot mongindarat dit bansa tokou gisom dot araratan poh dino ong it tanganak yoh boros noh dot momogun ot elaan momoros? Insan timpu sid kapaltarabang oku, sompi anak-anak ot nakatalad dogon mogom. Momogun ponong sid Pinampang ko Papar dati yaalo diri kempurasanku. Nga it nokotogu sid ginawoku, it tanak ki tumur 4 ko 5 toon iri sera minimbongut momoros dit tidi yo, momogun i daalo dot oluwantas babanar it pomoros. Miboboros nopoh it tidi om tama misalat dot momogun tantu om "english". It gulu aso poh ot koruangku, ong kooli oku sid kampung om kasambat dit monongkamaman, malayu ot gama daalo momoros, tiagonku dino, liyuw kou noh momoros momogun kimaragang tu iti noh boros tokou ot katanda dit bansa tokou kangku daalo. Nunu ot maan, irarakan oku nogi. Ong oluwantas ot gama tokou momoros kimaragang, tulun amu oduya mongoduat nunu kow song bansa. Nga ong boros wokon ot dadan pomoros, ogoliwong ot tulun mintutun dit bansa nu. Biano tu kikoruang oku noh dot bansa wokon, boros malayu ot oguna yah. Monosorou oku dit naajanganku sid kapaltarabang, notungag it ginawoku dot monuduk tongo tanganak ku boros dot kimaragang. Okudik poh ot elaan daalo, nga ilo noh tu lologoton dino. Iri noh kangku, kada tokou atalow momoros dot boros tokou kondiri gisom potungkus poh dit boros tokou sid tanganak kondiri. Kosog tokou noh monungkus dit boros kondiri, okon ko tokou noh kimaragang ot borosonku diti, rungus, sama, om wokon poh bansa dit waro ot boros kondiri. Ong aso poh kopidsalangan pakaio noh it boros kondiri sera miboboros sid walai. Ong okonko tokou kondiri isai poh ot monongkoorubatan dit boros tokou diti. Nunu poh dino ot gorong ong sompoori, aso noh ot kopituturan sid boros yoh kondiri. Minsanko abatil dati ot gama diko'o momoros dino, kada kow noh mongikum, pokirayou kou noh tu kotungkus om gisom koponuduk poh dit boros tokou kondiri. Kopiwosian Tadau Raya kumaa ensanan tobpinee dit Silam ot koosipan yoh, ong waro borosku soleleed diri siti id SAM dot kendaraat om apalui ot gama, liongo noh mantad sid pomusaraan dikoo. Isai-isai dikoo, okonko padarakan palangkas dot kurita ong muli kou noh sid pomogunan nontodonon duyu.

4 comments:

SANGURU said...

misaso ot kanginan om "nasib" kito oi tuan. Hehe. Bah, harap2 ada perubahan la

Robert said...

luwau po ka luwau sumapak sid pakou, kada poh mongirak, kokito ko do topurak.

sumoliu....om sumanang ko noh....
kotoluadad togumu...

Little Mike (LM) said...

genarasi mcm sya ni kerugian tidak buli becakap dalam bahasa sendiri walaupun boleh faham2 ala kadar saja. mudah2an org seperti sya tidak berulang kembali pada masa hadapan. :D

mmg rugi kalau tidak terjaga bahasa ibunda kita

Mogoron said...

O Sanguru, kayo noh monotos potungkus diti boros tokou sid tanak. Kowosian ong wokon nga maya.

Robert, madko waro ot pasandatan gima owo dino lalanu nuh, hi hi hi, kotoluadan i sid dika. Andamanku it sid asrama tokou poh dit gulu.

LM, ong aso poh kopidsalangan sid ginawo, sera sumirang koh kada tumiruwan dagai di Sanguru. Pogiim noh timbang dot bansa kondiri. hi hi hi.