SAM

SAM

Followers

Dengarkan Utara.FM - Macam Biasa Juga Bah

Thursday, October 15, 2009

KOGINAWAAN DOT GINAWO

Kopisambatan sid tuturan wagu boros dang kimaragang. Nokoliyot oku baabanar poogol dot tuturan siti. Waro boh kinopidsalangan. Ompodonku dot kadtuwadai i dikoo kikiawi oi kinoruangan kou. Tuturan biano iri no it ginawo. Kobasan diti riniba ong sukod dot norungadan noh, moguod noh mari ot ginawo dot mogiim dit koginawaan. Ong amu opusus it poginuadan dot ginawo sino ngawi noh dino ot kobuatano. Mingis-kingis seso, ong maatarip dot mangga nga milom tad it palad yoh i ot otoripan. Isai nopo kinoruangan ong moguod noh ot ginawo, kada kou noh sumodiri. Pogiim kow pokituturanan dit asaramaan dikoo om apatog it gama momusorou. Irad ko it moleeng, it maangatur dit koosipan dikoo om tambabaya. Mokitundan noh dot gama momosorou sid piginawaan. Nokuro tu kaa dino? Ong i seso milo poh om waro dati tompuwan taraat rumikot om monuduk dino dit amu kolintotok ot gama. Karalad poh dino dot kopokoruol dot wokon om kondiri. Ogumu noh mari tulun tokou noleong tu minoninggurup dit kaawanit. Kada kow tumiruwan diti, orubat okukudik tokou diti siti id pomogunan, isai suul opunso tokow. Munso noh iti boros tokou, podurunan poh gaam daton dot momunso diti tulun tokou kondiri. Iti noh it koginawaan ku sid piginawaan dikoo, oturon it gama, subai ko irad sumako dot kapaltarabang kah dit sasambatan. Ilaan it gama mononsulung dit pakakas kasalamatan tu nunu kelelo waro dati ot kopidsalangan tiya muutulud. Komoyoon subai jumaga i sid iso ot piginawaan, nunu kelelo waro kopidsalangan mantabana, opokorualan pomah nga amu i asaadan dino. Landu kow noh miginawo, nga tandayan dikoo noh sid piginawaan okonko waro nopo kopidsalangan miginawo nga gisom kopokoruol poh dino dot moleeng obpinee tambabaya om kinoruangan nu. Tuturan diti gisom mongukab dit pongitungan tokou ponong sid koginawaan om piginawaan. Kaliali kow noh kikiawi!

7 comments:

SANGURU said...

aman, lumangad okoi dikau. Ali-ali okoi e siti bandau/marudu boh. Mimang noh boh waro kosindualan dot tongo ginawo (mogintong kebobrokan) nga logot2on tokow monimpan...

Teruskan menulis brader, memelihara dan memulihara bahasa, tanggungjawab kita.

SANGURU said...

aralommm ommm ataromm ot komoyoon diti boros nu biano, aman, nga kada e boh kosusa tu nokupas dagai noh kikiawi nunu nopoh it nongo kololosok. Hehehe....atatamis noh diri om nokopiarati diri...malum noh boh ong sid alam maya...
Ogugumu noh ot mangasow om pipilaga atau tongo pikiran dit nongosilap. Nga syukur noh tu nosai noh diri...
Arap tokou dot tarussss MANTOP iti sulap SAM.
"OSIOU SUMIMBAN OM MONIMBAN"

SANGURU said...

ong intangan iti sulap tokou, mumula poh araarat om mirarapi...paga tu acaragas om awaras tokow misosokubang, nahhh apatog om alanji diiriii...
Bah, bila nosiliu diri dot istana, waro diri ominat mananganu atau monumpang. Jadi subaiko aawas tokou kikiawi tu ong osilap mongitung atau oguda tokou dot "duniawi" araag om otilib iti "istana" tokou.
"MISOSOKUBANG, MITATARABANG OM MITOTOLUOD TOKOU NOH POGI..."

ison said...

Mimang aralom om ogumu ot koontokon, nga posondoton ku i yoku sid pireeyan dot sukod wagu.

Ong sino dino, nah nosorisid no di mogoron monuturan siti diti dot subai ko tandayan i banar om okon ko poturutan nopo kenginan dot suwang ginawo.

Subai ko owiton i sid atantu ot gama mongitung supaya nunu nopo ot koompuson dino piginawaan/pireeyan somporiyon nga amu araag ot piambaabayaan.

Mogoron said...

Osian it sukod wagu tokou ong asadan gisom misingpatai gima nopokorualan dot ginawo, tu amu notuman it koginawaan, om nopupus it piginawaan.

Iti noh komoyoon dit tuturan diti, pongupono dit tongo sukod wagu.

SANGURU said...

bah kah aman, ajaro poh tongo sukod wagu boros tokou. words today. Soro sasabat. Mogot poh...

Umar al-Longobi said...

iri neri koompuson ong natanus noh 'Kinoringan' mantad sid ginawo dau. mangalajak noh mari ot telaan. obuli ie mangalajak nga subai ko asampin mongobirik, hehe.

ngam pinsan!