SAM

SAM

Followers

Dengarkan Utara.FM - Macam Biasa Juga Bah

Friday, December 11, 2009

Monoguwang Piuludan Dot Sirang.

Pipiro tadau diti, suwai mantad ko 1Tandek ot alasu sid pomogunan, iri noh it kinowowoyoon di Tiger Wood, pemain numbur satu golf songpomogunan. Okonko sukan ku ino golf om andangko amu oku tumingan dino barang. Okon nogi dot pominat oku dialo, nga gisom opirongow sid TV antawa otudungan sid Internet. Soleleed diri, opulang ot tabar dialo nga wawagu diti, gisom 13 ot tongondu minangakun dot ponokiagai dialo. Komoyoon dot monongondu bala yalo diri. It kelaan dialo sid golf awasi i dot tiruwanan, nga it monongondu kada tokou tiruwanai. Tuturan wawagu di Tiger Wood, okunon dialo tumingkod mantad sid sukan golf tu monoguwang om momiara dit sirang yoh. Iti poh makaa ot boros dialo, ongguron yoh dot powiliw dit sukan koginawaan yoh tu amu i bala otongkiyadan dialo it sawo om tanak yoh. Kinompuson dit pinigogutan daalo sompusasawo iri noh tu orubatan yaalo dit kowowoyoon sompoori dit tanganak daalo. Ai andang noh boh dot nopokorualan banar dot ginawo it sawo dialo. Om yalo kondiri nga laba ko nomomoluan. Nga mangarayow oku daalo minduduwo tu nakasaap monoguwang sid kopotutan dit pinigogutan daalo. Madada oku monosorow, madko opurimananku dot kerasa yaloi Tiger Wood dot aso noh guguna dit kondiri yoh, minsanko irad dino amu noolingan dialo it tanak yoh. Iri noh amu minitongkiyad yaalo tu amu monusa om osianan i boh dati yaalo diri dit tanak daalo. Muli tuturan sid di tokou, monikid kampung nga waro ot kopidsalangan dot sirang. Kiwaro i ot apadat dot miagai, monokiagai om mogiim ponokiagai. Oolingan it sirang yoh kondiri, iri kondiri yoh ot osorou. Ong irad diti kukuro waro kosimbanon dot pongitungan sid kengkakatan dot tulun kondiri. It tongo tanganak mantad sid naraag ot sirang, nongopilatan ot ginawo. Nunu poh apagon potumbongon it gama mongitung. Kadung mungkabang nga irad ko kabang dot naga, tu tapui ot sumoliwan. Ong otobping nga irad ko arimau monguni om med posoliwan poh dit sondulu alanggawit. Iri noh tandayai tokou noh mangatag-atag dit sirang tokou. Mogot ong orikatan tokou poh kikiawi dot surupu, om kadapat tokou potilombus dit iso ot bansa it banar noh ko riniba om amu nosorungan dot tompuwan naga om arimau. Andang noh dot waro i kopidsalangan sid gama mitanggom. Nga kada gisom kopisok dit koposiyon tawasi sid tanganak sumolusuk. Uma poh ilot tulun tobung mantad sampaping ot songpalui-palui, kada noh daton podurunai mangarag tulun kondiri. Totoso noh daton monoguwang om monginwawasi dit sirang tokou kondiri. Tatagon dikoo.

5 comments:

SANGURU said...

adehhh kalalangad iti boros tokou...

TaNaKwAgU said...

Bro Mogoron.emmm..Bolehka tulis sini blog cara-cara guna itu ini perkatan IT,SID,OT,DOT,DIT???kah.....tulung kiowo.baru mau balajar ba. hukhuk...

Tormiakasih.

IsOn said...

Waro songulun urang puti nokoboros dot...

"God first, family second, and carrier third." ka.

Adi, noontok no dialo Tiger ino mongitung dot pinotoori po dialo it 'carrier' do to nemot dialo dot 'family' ot oporolu posoguluonon.

Banar ino boros nu bro... torima kasih.

Tupono: Amu bo agagaan ong mungkabang nga tapui ot sumoliwan. andang ko aandab kiawi. haha.. :D

Mogoron said...

TaNaKwAgU, bagu permintaanmu ini. Saya cuma penutur Kimaragang dan menulis ikut citarasa sendiri. Saya akan usahakan permintaan saudara pada post akan datang, namun harus ingat saya mungkin tidak berupaya mengupasnya menerusi sudut linguistik. Sa'ap noh sumusui om momoros do kimaragang, TaNaKwAgU.

Maya said...

Ai...pu'uni, nokokotip oku dot lios dit sinurat nu Otto, nokokalakak oku no dit niudung di Odis doyino. Banar kikiawi om ano oponusunan it nisurat diri.

Iudung ku no doyoku nga apagon kumaya tu nonduyan no dot Minamangun ot kukumaya doyino ka torongu ku nga sumanang ot pongitungan tu okudik ot kopidsalangan dot gama pumomogun, kikiawi ot tulun nga milo monggonggon dino. dadi, sosompi nopo daton nga mokikomuro dot sorupu dot Minamangun daot tatayon po om olud, asanang misingkapatai. Amin