SAM

SAM

Followers

Dengarkan Utara.FM - Macam Biasa Juga Bah

Friday, February 5, 2010

TANGON DI IKUS

Waroo waro kaka dit kodori. Waro sompisasawo dot oleed no nokopisasawo nga aso tanak kabarasan. Monikid tadau sumbayang ino sompisasawo dino, mokianu sid Kinoringan supaya ataakan dot tanak. Sid walai, sid gopu ko sid bawang antawa sisiongo nopo bo, asal waro po ot kosiwatan tumuku, mungkodom om mintadua no yaalo dino sid Kinoringan. Insan tadau kaka, tiya sid gopu yaalo sompisasawo, minintadua no it tongondu kumaa sid Kinoringan, mokianu dot tanak. Amu songkuro koleed kaka iri, milom po tu waro poloolopug sid toning dit tongondu dino. Ungkalat om imatai bala ri nga ragang dot tikus iso i, kusai. Id lalangkasai dit tongondu iri momurut om loowo no it sawo yo. "Ati neti tanak dito nitaak do Kinoringan." Kabo dogimawat. Ototomoon neno sompisasawo dino. Nunu i, i nopo tanak dot tikus dino sabanar no nga sinimbit dot kondiw mantad sid rumun dot tikus nga nowilian yo om naratu diri. Aso kinosondoton, ngaangam sid toning dit tongondu tiya dit minintadua yino. :D Asoo no bo diri. Piniara i tawaawasi ino tikus dino sampai nosukod. Le'eed kaka ri, norikot no diri it panansawaan dit tikus. Adi minongoduat no it 'meleeng' yo dot isai no ot kenginan yo manansawo. "Ombo it omosuur (termahsyur) sid pomogunan ino no ot sowoonku." Ka simbar dit tanak (tikus). Adi umbal no diri it 'tama' mogiim nunu ot omosuur sid pomogunan. Aso neetung yo mogulu, ilo no tadau kabarasan. Minokilutu no diri dit sawo yo om boyo po dit duruk sumuwab gayad no kaka it tama dino minongoi ponong sid kosilaan tu sumambat dit tadau. Nokosilau nogi karawa kaka it tadau dino duato no dit tama. "Oi Adau, kaakun ko i ka ong ipasawo tekau dit tanak ku, tu ikau no ot eetungku dot omosuur sitid pomogunan?" "Nokuro tu reetan oku dikau dot omosuur?" Ka, duat dit tadau kembagu. "O tu asal kosilau ko nga anawau no pentongkop diti pomogunan." "Ai, banar neno nga waro po to ot omosuur no mantad dogon. Ino no ilo kawut. Tu ong otirung oku no dilo kawut, oluub no silod siba." Adi, rangkat no bo diri kaka it tama dino om sambat no dit kawut, nga sarup ot omosuur ka dit kawut, tu otilib po it kondiri yo aajangan do sarup. Saambato no dit tama it sarup nga simbaro no dit sarup dot ilo sokid kabarasan ot omosuur banar tu kukuro2 koologod yo tumongus nga aso nununu dilo sokid, amu i otilib. Adi sid sokid no bo diri ot kinopuguon do ginawo dit tama dino. Sulak no yino kembagu om indokodo no do it nuluw do sokid. "Ai aman, soleleed diri amu ko nakatakad siti. Dama om biano nokorikot ko. Nunu ot tomodon nu dino?" Ka dit sokid. "Agayo ot tomodon ku diti Okid. Banar no ka dot ikau no ot omosuur sitid pomogunan? Tu ong banar, ipasawo tekau dara dit tanak ku." Ka simbar dit tama. "Ades aman, banar ino om moompod okui dara dino tomodon nu dino, nga kasaasalaan aman waro iso po to ot aku alawanan diti. Mokot-kookot ad tiyan ku. Amui oruol banar belo nga aku ataanan tu mogid-koogid topurimananku, sodoi adau no aso tingkod mokot-kokot." "Nunu ino?" "Tikus." Kinompuusan bo dino tuturan dino, tikus i tikus ot nasawo dit tikus. :D Tupono: Asal reetan dot tikus, sisiongo poma korikoton nga tikus i tikus to koojungon. Kada nopo tulun sumiliw kenongko tumiruwan ugu ko tikus.

6 comments:

kyro said...

Babanar ino oi aman.Ong reetan do tikus...tikus neino...aso no suwai.

Awasi babanar ti tangon nu...panangon po kembagu ki....

Umar said...

:-)

mogoron said...

Ponong id pomogunan dot India, waro mari ki ot tulun sumamba dot tikus. Aso tinganan boh, omosuur i bala ino retan dot tikus.

SANGURU said...

panangon noh pinsan.
Tanak tikus dit ragang poh tubat dot athma ka dot tulunn. Kadisai ma mongiraraat banar tokou dot tikus....

IsOn said...

Hehe... omosuur beti tikus diti. :D

BUDIMAN JUGA said...

Entry ini sangat bagus sebagai panduan kepada semua masyarakat umum. melalui cerita ini, menunjukkan yg penulisnya mempunyai kerendahan hati dan bersikap terbuka secara umum. suda tentu kita tidak bole menilai seseorang secara seratus peratus berdasarkan apa yang kita lihat secara mata kasar kita, sebab selemah manapun org itu pasti ada kehebatannya sendiri yg kita sendiri tidak dapat menjangkakannya. sya dapat melihat secara peribadi bahawa jika penulis ini masuk kandang singa pun ia tidak akan diserang., sebab itu org yg mempunyai pemikiran yg positip, bahasa yg baik,sabar dan kerendahan hati yg cukup hebat lebih bahaya daripada seorg pengganas... kenapa sya katakan demikian.., sebab inilah senjata kebijaksanaan yg paling hebat dan bukan semua org mampu memilikinya.
kita seharusnya tidak terlalu menentang arus tidak juga selalu ikut arus, seperti pokok jambu dilentur ikut tapi tidak akan patah kecuali ditebang barulah habis cerita.